Reclaman a dimisión de Lago pola súa xestión do zoo

As asociacións Animalista Libera, Proxecto Gato, a Protectora de Animais e Plantas de Marín, Os Palleiros, Animais sen Fronteiras, Equanimal e a Protectora Moura solicitan a dimisión da concelleira de Medio Ambiente de Vigo, Chus Lago, pola súa “pésima xestión” e “falta de competencia” no referente á protección e o benestar dos animais na cidade, como consideran que “acreditan” as ameazas desde Bruxelas de pechar o zoo local.

Este colectivo denuncia que o parque zoolóxico “incumpre as leis comunitarias” e é “outro parche da concellería” que “se une ao incumprimento” do convenio entre Concello e Protectora de Vigo de 2008 de realización dun refuxio de gatos con capacidade para 300 animais. Na actualidade existen dous antigos cuartos que cumpren esta función “en situación terceiromundista”.