Feijóo foi ao Vaticano como parte do “séquito” do arcebispo de Santiago

Un membro da comitiva do arcebispo de Santiago, Julian Barrio. Ese foi o papel exercido polo presidente da Xunta, Alberto Núñez Feijóo, na súa visita, o pasado luns, á Cidade do Vaticano e, nomeadamente, na audiencia na que apostou por “poñer a Galicia á disposición da Súa Santidade”, o Papa Bieito XVI.

Segundo as actividades previstas na axenda oficial do pontífice que cada día edita o servizo de prensa do Vaticano, o día 1 de marzo o máximo dirixente da Igrexa católica tiña previsto entrevistarse con varios bispos e arcebispos procedentes de diversos países do mundo, a maioría deles, nas denominadas visitas ad limina, encontros quinquenais nas que os prelados lle dan conta ao Papa da súa actividade ordinaria.

Dentro dese programa de actos, a Santa Sé indicaba que Bieito XVI recibiría en audiencia ao arcebispo Compostelán “e séquito”, no que se inseriu o titular da Xunta, a súa parella e varios membros do seu gabinete. Esa mesma referencia é posible atopala no servizo fotográfico do Observatorio Romano, o diario editado polo Estado Vaticano e o único que ten a posibilidade de tomar imaxes nestas recepcións.

O carácter dos actos varía se a axenda consultada é, no canto da feita pública polo gabinete do Papa, a transmitida polo Goberno galego. A través da previsión de actividades elaborada polo gabinete de comunicación da Xunta, os medios foron informados de que “o mandatario galego, Alberto Núñez Feijóo, será recibido en audiencia pola Súa Santidade, o Papa Bieito XVI”. Do mesmo xeito, a información achegada polo Executivo á prensa despois do encontro relataba que Feijóo explicara o contido da xuntanza “logo de ser recibido en audiencia no Vaticano polo sumo pontífice”. Pola contra, esa nota informativa da Xunta non menciona a presenza do arcebispo de Santiago.

CRÍTICAS DA OPOSICIÓN

O feito de que Feijóo optase por “celebrar” o aniversario da súa vitoria electoral participando nunha audiencia co Papa non foi ben visto dende os grupos da oposición. Dende o punto de vista da voceira do PSdeG, Mar Barcón, a actitude de Feijóo ante Bieito XVI, poñendo Galicia “a disposición” do Papa sitúa ao presidente galego nunha “reminiscencia feudal”.

“É coma os cruzados e os señores feudais –ironiza a socialista–, que ían a Terra Santa e paraban no Vaticano para poñer as súas posesións a disposición do Papa”. Neste sentido, Barcón subliña que “Galicia non é de Feijóo”, senón que o popular foi “elixido democraticamente como presidente da Xunta, pero por catro anos”. “Semella –afirma– que ás veces o señor Feijóo ten unha percepción distorsionada de si mesmo e do que os galegos esperan del”.

Neste escenario, Barcón opta por situar a visita de Feijóo ao Vaticano na esfera da vida “particular” do titular da Xunta, unha análise semellante á realizada polo voceiro parlamentario do BNG, Carlos Aymerich, para quen as palabras de Feijóo sobre Galicia ante Bieito XVI responden “á emoción” e ás súas “crenzas”, pero non ao seu papel coma presidente: “Afortunadamente –matiza– estamos nun país democrático”.

Neste escenario, o deputado nacionalista coida que “fóra de fotografías co Papa”, Feijóo “ten que pórse a traballar”na organización do Xacobeo 2010, comezando por “intervir directamente na Consellería de Cultura e Turismo”.