A cultura inviste ata un 30% menos pola crise

A crise reduciu os orzamentos do sector cultural entre un 20 e un 30%. Esta é unha das conclusións do barómetro do Observatorio da Cultura, correspondente ao primeiro semestre de 2010, presentado pola Fundación Contemporánea, que realiza unha consulta semestral a un panel de expertos relacionados coa cultura española.

Respecto da enquisa realizada seis meses atrás, na que o 68% dos enquisados opinaba que a crise económica lle afectaría negativamente á cultura en España, a percepción maioritaria é que o impacto da crise económica no sector da cultura en España continúa igual (51,1%) ou se acentuou (38,3%). Tan só o 10,6% considera que o impacto é menor.

O sector da cultura cre que a recuperación non é inminente. Fronte ao 31,2% que espera ver o comezo da recuperación antes de que finalice o 2011, son maioría (51,6%) os que cren que será a partir de 2012 ou 2013, ou mesmo en 2014 ou máis tarde (17,2%). O panel de expertos valorou en primeiro lugar a adecuación das axudas das administracións públicas ás iniciativas culturais privadas. Para un 61,2% son insuficientes.

Respecto dos sectores aos que as administracións deberían brindar un maior apoio, o teatro (53,3%), a danza (52,4%), a música contemporánea (50,5%) e as artes plásticas (47,6%) son as que máis unanimemente xustifican a axuda pública. Literatura (33,3%), cine (31,4%), música clásica (31,4%), deseño (24,8%), vídeo arte (23,8%) e fotografía (21,0%) recollen opinións menos unánimes, mentres que a música popular (12,4%), a arquitectura (9,5%), a gastronomía (3,8%) e a moda (3,8%) son as menos defendidas polos enquisados.