As mans formando unha cuncha pechada cun paxariño acabado de saír do niño. O seu diminuto corazón a latexar na pel. Un funil. Unha carreira de maratón. Un abrecartas. As agullas de calcetar. Estorniños. Grilos. Xúpiter. Os autores e autoras premiadas na XIII e XIV edición dos Premios Arcebispo Juan de San Clemente fixeron inventario nos seus discursos dunha pequena antoloxía e obxectos e xestos cotiáns que constrúen a maxia da gran literatura. Vicente Molina Foix, María Reimóndez, Haruki Murakami, Luis Landero, Anxos Sumai, Julian Barnes. Seis maneiras de contar historias e de soñar. Pero, non esquezamos, a verdadeira maxia dos libros está non só en quen os escribe senón en quen os le. A entrega deste premio por alumnos de secundaria de toda Galicia é un motivo de esperanza. Da vixencia da literatura e do futuro da mocidade. Como di Anxos Sumai na premiada Así nacen as baleas: "Pensei no que escribira Ramón na Antoloxía dos obxectos cotiáns a respecto dun coco: se a auga non flúe, é que o coco está podre". Se non hai lectores, os libros tamén podrecen.