O número de homes e mulleres que falan galego é, seguramente, o mesmo agora que antes das eleccións autonómicas, pero agora sinto con angustia como a nosa lingua está en perigo porque, como dicía ‘Pachi' Vázquez na ofrenda floral na tumba de Ramón Piñeiro, "O principal perigo do Galego é o Goberno de Feijoo". O presidente da Xunta está actuando con irresponsabilidade errática có único obxectivo de encher o capizo con trinta moedas de votos. Espero que fracase nesta traizón á lingua que debería defender como representante de todos os galegos e galegas. Espero que fracase porque confío en que se está a producir unha gran corrente de opinión en defensa do galego, parafraseando a Mitterrand "unha forza tranquila". Así o puiden comprobar na manifestación do pasado día 17 de maio en Compostela onde milleiros de persoas diversas, de toda clase e condición, coreamos consignas perfectamente compatibles con calquera galego ou galega que simplemente ame a súa lingua. Penso que a mellor forma de evidenciar a utilización electoralista da lingua por parte do PP é precisamente apoiar este gran movemento cidadán en torno á Mesa pola Normalización Lingüística e fuxir de cortoprazismos partidarios dende dentro e dende fora da propia Mesa. É a esta a quen lle corresponde a responsabilidade de configurar unha posición con vontade de exercer de columna vertebral da defensa do galego, con visión ampla e xenerosa, na que poidan verse recoñecidos cidadáns de distintas posicións políticas. Un elemento clave para a extensión do galego é, precisamente, a identificación da lingua con elementos de prestixio social, por iso resulta imprescindible o uso público da "lingua propia de Galicia" por tódolos representantes e dirixentes sociais, especialmente no caso dos representantes políticos, pero aínda máis no caso do presidente da Xunta e dos conselleiros e conselleiras, que están obrigados por xuramento ou promesa, cando asumen a responsabilidade do seu cargo, ao cumprimento do Estatuto de Autonomía. A estratexia do Partido Popular non é improvisada, primeiro móstranmos unha realidade absolutamente minoritaria, cando non directamente unha mentira, e presentan ó castelán como lingua en risco en Galicia, dan por feito que se trata dun problema xeral de toda a sociedade e logo "consecuentemente resólvena" aplicando medidas de impacto xeral a problemas que na práctica non existen. Por iso a resposta ten que ser firme e de longo alcance. É necesario que tomemos conciencia do risco no que se atopa a nosa lingua, por iso é preciso reivindicar con tranquilidade no día a día os dereitos lingüísticos dos que falamos galego, non contra ninguén senón a prol de nos mesmos.