Algo así rezaba un dos lemas da campaña do PPdeG nas últimas eleccións autonómicas. Por desgracia parece ser que non para todo. Ía ó lado da marca do axente 009. Boa falta fai, xa que o oscurantismo na recente compra de licenzas de Microsoft por parte da Xunta empeza a ser un caso digno de poñer a traballar nel o mesmísimo James Bond, e a saber se aínda así sacaríamos algo en limpo.

Téñense visto a estas alturas moitas opinións e pseudoexplicacións sobre o asunto. Maioritariamente se ten falado dos 2,2 millóns de euros que custou a operación, unha mera distracción do realmente importante.

¿Podería a Xunta ter aforrado estes cartos?, dificilmente; ¿pode ríase ter optado por cambiar a Software Libre?, con toda seguridade; ¿que iso esixe unha planificación a longo prazo?, sen lugar a dúbidas; ¿que faltou compromiso tanto na anterior administración como na actual e sobrou incompetencia e ineficacia por non prever esta situación?, quen sabe se non é o que se pretendía.

Unha das poucas verdades é que unha empresa que dificilmente repercute un euro en Galicia levou unha adxudicación millonaria de poñámoslle sobre tres Audis. Pero a Xunta so ten dereito a utilizalos, non é a propietaria, e dentro só pode ir unha persoa de cada vez.

Microsoft perdóalle a vida á Xunta e os galegos, permitíndolles seguir malvivindo escravizados polo seu software. Un software que inda por riba non asegura a privacidade dos nosos datos. ¿Que ocorre se Microsoft decide que non está interesada en vendernos as licencias? Sendo o único

provedor como se ten alegado ¿pasaríamos a ser uns delincuentes para que a Xunta non deixara de funcionar? ¿Que pasará cando a Xunta teña que renovar outras licencias? Se a empresa «x» que subministra o software «y» di que en lugar de 2,2 son dez millóns por algo que a eles non lles costa un peso ¿pagámolos e calamos?.

A Xunta e os seus responsables, cun sadismo incomprensible, sométense a unha escravitude autoimposta en lugar de usar software libre, e por que non, software libre producido en Galicia da máis alta calidade. ¿Qué opinaría Castelao co seu “Denantes mortos que escravos” deste novo tipo de escravitude a que se someten os galegos?

>> Juan Antonio Añel pertence á asociación fundada por Richard Stallman que promove o uso e desenvolvemento de software libre.