“A pobreza destrúe a esperanza”, dixo Vicente Ferrer. Un de cada seis habitantes do planeta morre por falla de alimentos pero sen chegarmos ao extremo da fame, a pantasma da perda de poder adquisitivo e diminución dos recursos económicos para as familias vémola nestes días en Galicia. Vivimos un momento de especial dureza para tres dos nosos sectores produtivos estratéxicos: metal en Vigo, lácteo en Lugo e textil na Coruña. Ao tempo, as cifras do paro medran e as previsións macroeconómicas estiman o comenzo da fin da crise nun lonxano 2012.

Todo indica que no tempo que resta veremos reproducido o vixente modelo de guerrilla urbana, destrucción de alimentos, boicoteo á producción fabril e bloqueo empresarial, en sucesivos conflitos que se terán de dar ata que o ciclo xire e pasemos a outra fase que ninguén sabe con certeza como será. Urxe, neste contexto, estabilizar o mercado laboral na procura dun novo modelo productivo. Nun escenario mundial onde a tendencia á desigualdade aumenta exponencialmente, radicalizar a reivindicación sectorial é tan arriscado coma inxusto é o discurso depredador de empresarios autistas que non dan reparado nas consecuencias dos abusos cometidos polo capitalismo financieiro.

O afondamento da actual crise e o seguro aumento da pobreza debera alertar sobre a inoportunidade de plantexar conflictos en base a intereses corporativos porque ocultan outras situacións desesperadas e semella pouco atinado acudir a receitas de onte para patoloxías de hoxe. Sindicatos e empresarios libran en Galicia, nestes intres, unha batalla local que se enmarca nun conflicto global e debería terse en conta cando se está a negociar con métodos e argumentos anacrónicos e só útiles para desafogar a ira ou para manterse na ilusión de que algunha das partes gaña algo con enconar posicións e alonxarse do acordo.

“A soberbia nunca colle contra as paredes, sempre rebota”, dicía a avoa da miña amiga Pilar, que era da Baleira de Lugo pero que vos tiña moito mundo.

>> María Xosé Porteiro, xornalista e política socialista, inicia con este artigo as súas colaboracións en Xornal de Galicia e Xornal.com.