CARTAS DE PAÍS A PAÍS

-Rexionalista Benito: Cun motor “libre de impacto” e un cárter de aleación, o primeiro Audi da historia xa naceu, alá por 1901, innovando na industria automobilística. Afeito ás intrigas empresariais, nunca imaxinou sen embargo o seu creador, un tal August Horch, que a súa marca acabara converténdose, primeiro, en instrumento político e despois, no terceiro argumento que máis lembran os galegos da campaña do 1-M despois da crise e do paro, segundo a enquisa do CIS. Catro meses despois das eleccións, os catro aros continúan acaparando a axenda do goberno. “Operación Audis” chámanlle.

Como o cidadán está maioritariamente convencido de que os políticos sempre andan a sacar proveito persoal –do “Sultán de Monte Pío”. E dado que o paisano común só queda co titular –e calquera manipulador profesional sábeo–, seica nunca saberá que dous dos tres coches blindados e dezaoito dos vinte convencionais que agora pon á venda a Xunta mercáronse, en realidade, con Fraga en San Caetano. Posiblemente a arte da demagoxia impedirá que cheguemos á conclusión de que austeridade, pouca, porque eses vehículos malvendidos terán que ser substituídos por outros do trinque.

Por todo isto, todo simple mortal crerá tamén que os do PP e os do BNG son uns perfectos mangantes só con botar unha ollada ao xornal que contou en febreiro que varios actos do Xacobeo 2004 adxudicáronse a firmas creadas “ad hoc” e que agora conta que os nacionalistas contrataron moito ás mesmas empresas. Sen máis. Sen indicio nin sinal de falcatruada algunha.

-Entusiasta Vicetto: Aquí en Madrid a actualidade anda protagonizada por outro caso baleiro de probas e imputacións: as supostas actividades pesqueiras de balde do xa ex director do CNI. É posible que o conto quede en nada, sen embargo, o xornal que “destapou” as denuncias –por suposto anónimas– anima aos seus lectores a facer sangue, a opinar: “Que le embarguen todo”, “que le metan cadena perpetua”. Claro que no mesmo foro xornalístico alguén pregúntase “¿y Bárcenas, y Camps?¿Dimitirá el señor Rajoy si son hallados culpables?”.

P.D: Horch (Audi en latín) si dimitiu da empresa que el mesmo creara. Pero por desavenencias, non por calumnias.