a dimensión económica é, sen dúbida, a susceptible de ser relegada ao último lugar no que atinxe a temas de saúde. Mais, cos datos aportados pola Universidade de Santiago, cómpre non perder de vista que os picos de incidencia da gripe nova van coincidir co lado máis negativo da economía tanto en Galicia como en España. Isto é, que as malas novas sanitarias poden rivalizar en preocupacións e cobertura mediática coas do desemprego, a crise con maiúsculas que está a tumbar o sistema económico a nivel estatal e autonómico.

Segundo a última Enquisa de Poboación Activa (EPA), a taxa de paro en Galicia é do 12,22%, máis de cinco puntos por debaixo da media española. Nos últimos tres meses, o desemprego rexistrado na comunidade experimentou un descenso acumulado de preto de 10.000 persoas, atribuible sen dúbida ao repunte da actividade no sector terciario –estacionalidade por Semana Santa e verán– e polas obras do Fondo Estatal de Inversión Local (Feil). De feito, das máis de 7.000 persoas que atoparon traballo en xuño, o 62% fixérono na hostalería.

Isto ten unha caducidade que ninguén dubida: setembro. Que converxan de baixa laboral pola gripe nova o 20% da poboación activa –unhas 266.200 persoas– cun indiscutible aumento do desemprego será un problema engadido ao sanitario, que conlevará un incremento económico importante no medio dunha crise da que non imos saír ata ben entrado 2011. A taxa de paro seguirá a medrar en España e Galicia, e ao mercado laboral tampouco lle convén un resfriado. Malia a que a saúde sexa o primeiro, as contas son tamén preocupantes.