Se unha sociedade se recoñece a si mesma como nación, actúa dunha maneira moi distinta a se se percibe só como unha rexión ou unha provincia. No primeiro caso, os distintos grupos sociais detectan a existencia dun determinado interese nacional e poden mesmo antepor este a calquera outra demanda. No segundo caso, non é posíbel ningunha vertebración nin tampouco ningún proxecto común: todo o máis que se dá artellado é a repetición de consignas que proveñen de fóra desa sociedade.

Os nacionalistas concebimos Galiza como un país en si mesmo, completo, non aínda soberano, mais si en movemento, cara a onde, xa o veremos, nada está predeterminado. Os que non o son, os que non son nacionalistas, conciben Galiza como parte, como apéndice, e están sempre condenados a que o retrato non se faga desde dentro, senón sempre desde fóra.

Durante o debate do novo Estatuto, truncado polo sectarismo do PP, o establishment mediático, sempre hexemonizado polo pensamento conservador, facía mesmo mofa de que os nacionalistas puxésemos tanta énfase no recoñecemento do termo ‘nación’. Obxectaban que tal asunto non facía parte das preocupacións dos cidadáns (eles, que tanto se preocupan polo pobo). Agora sabemos que cando unha sociedade se recoñece a si mesma como nación –por exemplo, a catalá– é cando está en condicións de enfrentar un debate aberto e tenso co Estado. Agora sabemos que só cando unha sociedade se olla no espello como maior de idade é capaz de poñer cifras á súa emancipación. E agora sabemos que todo iso acaba resolvéndose cunha considerábel mellora das súas condicións materiais de existencia.

Galiza, en cambio, foi ao debate mermada por non dispor de novo Estatuto. Debilitada polo enorme peso que na nosa sociedade ten o aparato de propaganda conservador que nos nega como pobo.

Estou certo de que miles de galegos e galegas tomaron nota estes días e tiraron as oportunas consecuencias. Agardo que iso se traduza nunha manifestación o Día da Patria Galega verdadeiramente masiva. Que queiran que non, a nación galega existe e non vai anicar a cabeza por máis tempo.

>> Bótalle un ollo ao blog de Mexuto.