Descoñecemos cal é a política económica do Goberno galego, digo máis, descoñecemos quen é o responsable da política económica da Xunta. Temos, á falla dun, dous conselleiros do ramo, conselleira de Facenda e conselleiro de Economía e Industria, pero ningún deles, e tampouco o presidente, concretan cal é o guión, a opción, o modelo de xestión dos nosos recursos, nin cales os obxectivos ou as medidas que aplicarán para acadalos. A única novidade nesta materia é o enganoso discurso da austeridade coa que se pretende xustificar a parálise dun Goberno que asiste ao paso da crise como se non fora con eles.

Durante a pasada campaña electoral falouse moito do Igape (Instituto Galego de Promoción Económica), pero no tempo que leva a actual Xunta, non se ten definido ningunha reforma concreta, nin sequera se ten afirmado a vontade de facer tal cousa. De momento o que está a suceder é que se restrinxen as axudas ás pequenas e medianas empresas, que son as que máis o necesitan para saír da crise, e se aumentan as das organizacións empresariais. Isto son cartos tirados, xa vimos o que lle sucedeu á Confederación de Empresarios de Galicia nos tempos de Ramilo, cando recibiron da Xunta recursos a esgallo, e acabaron cun furado de 1.000 millóns das antigas pesetas e con xuízos cruzados acusándose uns a outros de meter a man na caixa.

É certo que algunha das propostas de reforma do IGAPE que se falaron, como convertelo nun Instituto de Crédito Oficial, eran máis aparentes que reais. O Igape xa actúa en paralelo ao ICO, xa presta crédito ás empresas a través de convenios co Ministerio de Industria e xa participa no capital de empresas privadas con fondos de Capital-Risco. Nesta liña pódese reformar a súa estrutura ou a de XesGalicia, que é a sociedade xestora dos fondos Capital-Risco, pero na práctica as súas capacidades quedarían como están. A verdadeira reforma sería abrir a posibilidade de emitir débeda pública. Así poderíase contar con moitos máis recursos para axudar ás empresas e para deseñar políticas sectoriais de carácter estratéxico. Sería máis eficiente retribuír aos investidores en débeda e utilizar os recursos captados por esta para fortalecer as liñas de axudas, que o modelo actual no que tódolos recursos saen dos orzamentos. Para dar este paso habería que reformar a Lei de creación do Igape, e aínda que nos axudaría ter un novo Estatuto de Autonomía actualizado como os reformados recentemente, o actual permitiría esta reforma (artigo 44.9). Pero estas son as cousas das que non falan o Sr. Feijóo nin os conselleiros económicos, non din cales son os seus obxectivos, non sabemos si é porque non os teñen claros ou porque son inconfesables. Non sei que será peor.